香港的咖啡店越開越多，難得有一間竟以摩登精品茗茶為主題，搜羅世界各地頂級茶葉，沖調一系列茶飲和茶拿鐵。飲茶之餘，餐點仲全部都係素食！每一道都用心創作好有驚喜。
++++++++++++++++++++++++++++++++++++++++++++++++++++++++++++++
按讚我的粉專，追蹤最新鮮早餐與蔬食旅遊情報：
++++++++++++++++++++++++++++++++++++++++++++++++++++++++++++++
茶研位於中環陸海通大廈 (LHT Tower) ，由中環地鐵站 D 出口出來，一抬頭就望見，非常容易搵，最正當然係唔洗行上山啦。
上一層扶手電梯就到，茶室在升降機大堂後面，唔好傻傻的上左二樓啊。
茶研由早餐做晚餐時段，中午來吃可以選這個套餐，主食加HK$20就有茶飲。
餐廳比我想像中大，窗邊整個空間都屬於它們。
外面座位比較多，中間有張好長的檯。
玻璃櫃入面的蛋糕都好吸引，仲有支裝果汁和大杯茶。
蛋糕都屬於蛋奶素，只有其中一款 Loaf Cake 係 Vegan，食純素的朋友可以留意返。
Scone 有鹹也有甜味，全部都係店家自己製作。
花花蛋糕最適合相機食先的少女們。
手工曲奇餅都有好多款口味喎！
店入面的空間比較光猛，最盡處係兩張卡位四人檯，另外兩張都係雲石檯面影相幾靚。
飲品都以茗茶為主(其實都有手沖咖啡既，自己向店員查詢)，上面那張是精品茶葉，可以加水沖兩泡，兩個人分享飲都OK。下面那些就是特調凍飲和茶拿鐵，凍飲的話頭兩款係招牌，「一樹梨花」用左蝶豆花茶，所以有半杯係藍藍紫紫色，好多人叫來影相。
茶拿鐵則用了 Rude Health 的豆奶或杏仁奶，可以自由選擇，不過我會建議用豆奶，因為杏仁奶本身的味道太霸道，會搶了茶葉的風頭。
主食有分全日早餐和主食兩大類，全部都係素食，純素無蛋奶的話就只有兩款，一頭一尾兩個餐點。
餐牌後面係甜品的部分，另外有幾款非茶類的飲品。
茶研仲有自己的音樂 Playlist，都幾有趣喎。
手沖咖啡包係來自同集團的 The Coffee Academics 的出品，相信好多朋友已經很熟悉。
Savory Scone + Tomato Chutney HK$38
Scone 有鹹味有甜品，我就覺得食鹹的比較特別，店家自己焗製夠晒新鮮。今天這個口味充滿芝士香氣，另外有些菜和粟米，配個香濃的番茄醬幾好食。
Overnight Soaked Grains HK$68 (VEGAN)
這杯賣相漂亮的慢泡燕麥，入面有幾款唔同的榖麥，包括大麥和藜麥之類，浸在有印度香料茶味道的椰子奶之中，吃起來非常醒神，的確很適合做早餐，食完身體不會有負擔又可以吸收多種營養。
Impossible Skewers HK$128 (VEGAN)
另一款純素餐點就用了 Impossible Meat，三串素肉棒串燒下面，有各種各樣充滿春天氣息的蔬菜，最底的是用青豆和羽衣甘藍製成的醬，另外個有兩片脆脆小麵包。我覺得肉串直接食有點偏鹹，夾埋個青醬和鮮甜蔬菜一齊食會好少好。
OmniPork Dan Dan Noodles HK$108
素肉擔擔麵是非常受歡迎的菜式，採用大量新豬肉，混雜了炸蒜、花椒和碎花生等等粒粒，吃起來好多東西咬。辣油沒有放很多，吃起來只有微微一點辣意，我覺得可以再刺激一點。
Beetroot Coconut Pancake HK$78
用紅菜頭自家調製的特色斑戟，加了 apple cider 代替雞蛋，吃起來口感偏軟糯那種。上面白色的是Greek Yogurt，配一個大吉嶺糖漿，吃起來也不至於太甜膩，是一款非常健康的甜品。
沒想到在喝茶的小店，也可以吃到款式這麼豐富的素食料理，實在令人驚喜。
Steamed Basket with Wakame Rice HK$108
賣相最誘人的要數這個點心拼盤，佢地實係以四隻蒸餃為主角，每隻的餡料都有不同，連包法和形狀都有變化，最適合驚悶的朋友。餡料都以當季蔬菜為主，旁邊還配了一個肉燥菜飯，素肉都係用左新豬肉。旁邊附那個汁酸酸甜甜都幾開胃。
台灣夕陽紅 HK$98
單品茶葉都可以沖兩泡，這就是第二泡的樣子。這個台灣茶葉係用紅茶的製法，處理平常用來作烏龍茶的茶葉，喝起來兩種特色都有一點，味道也有點甜甜蜜香。
Botanist HK$68
這杯 Botanist 以冷泡潮州鳳凰單欉茶作基調，加入紅棗桂圓露及彩色花花冰粒作點綴，附上自家製的大吉嶺春摘茶蜜，甜度可以自己控製。飲起來味道清幽細長，滋味濃醇。值得一提的是用來做靚靚冰粒的花，原來是泡花茶剩下來，循環再用夠晒環保。
冷泡茶和茶蜜都係自己倒。
普洱拿鐵 HK$58
千祈唔好錯過好有特色的茶拿鐵，我覺得普洱和鐵觀音都非常特別。打成奶泡之後非常幼滑綿密的豆奶，輕輕襯托出普洱的茶香，表面一層朱古力皮讓味道帶來另一個層次，喝的時候先喝到可可香，然後才感受到普洱的蹤影，整個經驗非常有趣。飲完記得抹嘴，唔好好似我咁嘴角帶著可可粉走。
其實相對於咖啡，我更鍾意飲茶，茶藝的知識同樣博大精深又非常有趣。茶研位置咁好，又有靚茶飲又有靚素食，下次經過中環要搵地方坐又唔想行上山，應該都係首選！我仲要試埋另外幾素茶拿鐵呢！
+++++
餐廳資料
The Tea Academics 茶研
地址：中環皇后大道中31號陸海通大廈 (LHT Tower) 一樓
電話：+852-3187-7303
營業時間：08:00 - 20:00 (星期一至五)、10:00 - 20:00 (星期六至日)
FB：https://www.facebook.com/TheTeaAcademicsHK
IG：https://www.instagram.com/theteaacademics/
地圖：
+++++
Δ 版權所有 (歡迎轉貼連結。嚴禁全篇圖文轉載！)
Δ 邀訪 / 合作 / 推廣 / 聯絡請洽：misskitb@gmail.com