香港返深圳越來越方便，請唔到咁多日假搭飛機去旅行，近近地上去行下食下素食餐廳都幾正。國內最大優勢係地大物博，食飯坐咖啡店都悠閒感十足，又可以食到中國各地唔同菜系。搭地鐵打車又平又簡單，落單全部用wechat掃碼，唔需要同人溝通最適合 i 人。
【電子攻略/讀者優惠/其他平台：https://linktr.ee/misskitb】
+++++
深圳必吃3間素食餐廳
(1) 慶春樸門
(2) Young Vegan 有樣蔬食
(3) 素生麥
_____________________________________________
1/【零負評米芝蓮推介素食餐廳】
深圳最出名的素食餐廳首推這一間，個個返去都去排隊食 😂 唔想等位的話建議避開正常食飯時間。未入門口已經感 受到親切服務，日系裝修高雅又有情調，坐低自己掃碼點 餐非常方便。菜式除了中式菜系，也有少量西餐以至東南 亞肉骨茶，單價唔貴可以放心亂點，最平個芋頭竟然係6蚊人仔，驚食唔晒不仿自備食物盒打包。
烏梅汁
用手機落完單，店員先送上會噴煙的浮誇烏梅汁，我都唔肯定點解會送，可以係新會員或者食夠某個金額。烏梅汁都幾大樽，斟好多杯都未飲晒，酸酸甜甜幫助消化。
桂花荔浦芋頭 ¥6
見到呢個咁平梗係點一個試試，可能係某種市場策略，芋頭的確入口即化，帶淡淡清甜桂花香，作為開胃菜唔錯。
澆汁豆腐 ¥16
餐牌上都頗多豆製品，豆干豆腐腐皮等等，大部分係川味，我驚太辣所以揀一個望落最唔刺激嘅。不過佢個汁都微微有少少辣，又帶點麻醬風味，幾特別。
西湖糖醋藕 ¥24
必點菜式之一，蓮藕外層好似裹左一層脆糖，應該係冰糖胡蘆啲朋友，不過做左酸甜版，咬落脆口又真係幾正。
松茸湯包/5只 ¥48
蒸左頗耐的一籠湯包，上來原來是扁扁的，夾起唔易爛，入面係三種菇煮的松茸湯，香濃美味。湯包只有湯沒有肉，食成籠都唔會太飽。
燙四季時蔬 ¥28
想清清地食個菜估唔到連埋個爐上，幾種時蔬都浸得入味，白蘿蔔都夠腍，食完菜想飲埋個菜湯。
慶春樸門
地址：南山區萬象天地里巷3樓NL323A
前往方法：地鐵高新園站A出口，入商場行約5分鐘
_____________________________________________
2/ 【商廈高層神秘餐廳 手工烘焙＋蔬食】
餐廳近福田口岸，上去食飯都算快捷方便。藏在商廈上面，最方便的方法是找到麥記旁邊的貨𨋢上樓。上到去好似辦工大樓，門口都似辦工室多過似餐廳。
落地玻璃開揚景觀，裝修有少少文青風，座位唔算好多。菜式用色彩繽紛的原型食物為主，麵包和pizza餅底都係自家製作，推薦pizza和冬陰功湯，甜品有純素巴斯克蛋糕，食飽仲可以順便買定麵包做早餐。
年輕人主理，麵包、糕餅、薄餅底等等都係自己做，節日都會推出純素禮盒等等。
可以買到純素方包、歐包和貝果等等。
鍾意食餅乾曲奇又可以買下。
燕麥南瓜甘藍濃湯 ¥19
超級濃厚的南瓜湯，仲有羽衣甘藍和大量南瓜籽咬。
有機天貝牛油果披薩 ¥78
勁足料天貝pizza，天貝加牛油果加純素芝士呢個配搭都好新穎，番茄醬香濃，薄餅底夠薄又有咬口，非常推薦。
Young Vegan 有樣蔬食
地址：福田區石廈街新天世紀商務中心C座低區23層C2309
前往方法： 石廈地鐵站F出口，直行見到麥記，隔離有條巷行入去搭貨𨋢上23樓即可
_____________________________________________
3/ 【來自蘇州純素烘焙品牌 麵包蛋糕餅食】
位於南山高級住宅區商場，附近幾間餐廳都係日系設計高檔路線。品牌源自蘇州，在深圳開設第一間分店，店員都係食純素好有修養，亦很樂於分享素食心得。店內外均設簡單座位，麵包蛋糕可買走也可現場食。飲品有特色植物奶/果汁特調咖啡，亦有無咖啡因選項。
每日提供不同純素蛋糕和甜品，豆腐乳酪都好吸引，夏天好似會有豆腐軟雪糕。
麵包都係每日新鮮出爐，品項唔算好多，主要日式包和歐包，也有scones、鳳梨酥和曲奇等。
菊次郎的夏天 ¥36 / 花生醬朱古力蛋糕 ¥36
除了植物奶咖啡，亦有果汁類咖啡，配蛋糕非常適合。純素蛋糕來說亦很鬆軟，口感不會太奇怪，亦不是很甜的口味。
花生麻糬 ¥24
使用國產有機花生醬，這個包還加了麻糬和素鬆，食落味道層次豐富，又有多重口感，喜歡花生醬包一定要試。
素生麥
地址：南山區沙河街道深云路二僑城一號廣場裙樓L1-15
前往方法： 僑城北地鐵站D出口，林蔭大道直行8分鐘
_____________________________________________
待續......
+++++
Follow me on Instagram @misskitb
+++++
Δ 版權所有 (歡迎轉貼連結。嚴禁全篇圖文轉載！)
Δ 廣告查詢：hello@veggirlclub.com
Δ 邀訪 / 合作 請洽：misskitb@gmail.com