2020/10/16

[香港素食] 中環 | VEDA:超驚喜!全新Fusion素食餐單!



位於中環 Ovolo Hotels 的 VEDA,屬香港少數專做素食的酒店餐廳,最近配合酒店集團的「純素之年」活動,特別推出全新素食餐單!我早幾日參加媒體試食就試左好幾款菜式,唔係講笑,真係好驚喜好好食喎,同香港平時食到的素食菜式完全唔同風格。

++++++++++++++++++++++++++++++++++++++++++++++++++++++++++++++

按讚我的粉專,追蹤最新鮮早餐與蔬食旅遊情報:

++++++++++++++++++++++++++++++++++++++++++++++++++++++++++++++



Ovolo Hotels 中環分館在山上,就近蘭桂坊一帶,唔想行斜路的話可以經扶手電梯上山,再穿過大館一出就見到,由中環地鐵站行過去有少少遠但唔難搵。



OVOLO Hotels 今年首推純素之年,兩間酒店餐廳、酒吧和房間服務都全面轉晒素食,中環 VEDA 已經可以食到,黃竹坑的 Komune 現在裝修緊,等11月就有得食。這天媒體試食會就精選左兩間餐廳的特色素菜。


Heirloom Root Vegetables (Komune)

Ovolo Hotels 集團老闆是印度人,所以餐廳菜式都有少少印度style,但又唔係好傳統好勁香料風味果種,比較Fusion左多國料理。我覺得都幾偏中東style,另外加歐洲多國菜咁樣,間中又有少少中菜特色,整體來說是非常有趣,香港很少地方會吃到這樣的素菜。

圖中這個像小森林的前菜賣相可愛,下面白色的是自家製土耳奇式優格,口感比希臘優格更濃厚。我從來無諗過優格可以配蔬菜,搞不好我都可以在家試試用希臘優格配沙律菜。平常不吃蘿蔔的人,見到原條彩色小蘿蔔本來都唔太確定,但配埋個優格又真係幾好食,而且好鮮美。


Truffle Polenta Bites (VEDA) HK$90 / Silk Route Momos (VEDA) HK$90

芝士玉米炸波波是餐廳一個很受歡迎的菜式,所以轉新菜單都一定要有佢。Polenta 是玉米粉,加水可以煮開成糊仔,平時都會做成玉米餅之類,這裡就將它塑形成小球體,中間再夾芝士和黑松露醬,炸一炸整個香口又美味,就算不是素食者都會很喜歡。

餃子入面夾了菠菜和芝士,大廚說這是將西式意大利雲吞常用的餡料,改放在東方餡子入面。配一個辣辣地的番茄醬,醒神開胃。



這是玉米波波的橫切面,它是實心球體充滿玉米香,中間芝士唔算非常多,倒是盤子上滿滿 parmesan cheese 勁香勁吸引。總廚話 Parmesan Cheese 的鹹香很難用純素芝士取代,所以暫時都係用真芝士,到佢地找到可以代替芝士的產品可能會轉用。


Puy Lentils (VEDA) HK$140

我一向不是扁豆的愛好者,不過這個用意大利飯煮法做的扁豆又幾好食,佢入口有一個好濃的香味,我問返同檯的食肉朋友才想起,那個是牛肉汁的味,沒想到配扁豆都幾夾。除了扁豆之外,吃的時候還可以咬到脆脆的榖粒,中間個焦糖洋蔥更係畫龍點睛。


Corn Kichdi (VEDA) HK$140

我的頭號推薦是這個「玉米粥」,它做成陰陽色擺盤純粹係for影相靚,總廚話要拌勻食味道先balance。黃色的是用新鮮玉米、椰子奶、鹽和黑胡椒煮成的「粥」,聽大廚說才知道材料如此簡單,可以返屋企試下煮。它最美味的地方是充滿新鮮粟米的甜味,秋冬食真係好療癒!配埋隔離的菇菇咖喱,我日日食都唔會厭,食到差d唔記得到應該配埋一齊食的脆脆片。


Spiced Purple Cauliflower (Komune)

烤椰菜花絕對是我的菜!上菜的時候以為要自己切,一叉下去才發現原來已經切好一件件,方便食用。紫椰菜花表面有一層脆脆,入面煮得好柔軟,而且充滿香料味。隔離個醬係烤茄子,我估係成個茄子拎去燒成焦炭,再去皮熬成蓉那種做法,吃起來超強烈煙燻味,真係童叟無欺。


Basque Burnt Cheesecake (Komune) / Coconut and Banana Pie (VEDA)

甜品有芝士蛋糕又係無得輸。上面果款椰子香蕉批無蛋奶屬純素,上半部白色的充滿椰子香,下面加了椰棗有天然甜味,另外也吃到香蕉泥。口感都唔錯,不是很沉悶的純素蛋糕。

這個燒焦芝士蛋糕非常有心思,我第一次食上面有咁多果醬的版本。蛋糕本身加左 Rosemary 奶和 blue cheese,吃起來有淡淡的香草味,但不會有藍芝士的誇張腥味。倒是我覺得最搶味是蛋糕上面的果醬,吃起來酸酸甜甜,唔小心食晒成個先發現芝士蛋糕都幾飽。

有創意又好食的素食真叫人回味無窮,我期待11月Komune開的時候可以再去食下,搵日都約朋友再去VEDA回味個粟米粥先!

+++++
餐廳資料
VEDA

地址:中環亞畢諾道2號
電話:+852-3755-3067
營業時間:06:30–23:00
官網:https://ovolohotels.com/ovolo/central/veda/
FB:https://www.facebook.com/vedahongkong
IG:https://www.instagram.com/vedahk/
地圖:


+++++
Δ 版權所有 (歡迎轉貼連結。嚴禁全篇圖文轉載!)
Δ 邀訪 / 合作 / 推廣 / 聯絡請洽:misskitb@gmail.com