.png)
如果你對食好有要求，想體驗一下搜羅全球各地頂尖食材 ，傳承正宗中菜的烹調精粹，又同時完美融合現代餐飲元 素，盡顯「雅 • 緻 • 和」之美的中式素菜，這間餐廳必須存低。
素食套餐共有9道菜式，兩位起須於一天前預訂，每道菜都又靚又好食，最尾亦唔係靠個炒飯餵飽你😂 (有蛋奶/部分含五辛，如有特別飲食需求可向餐廳查詢)
【電子攻略/讀者優惠/其他平台：https://linktr.ee/misskitb】
+++++
餐廳在跑馬地，話近唔近話遠都唔算好遠，由電車總站行過去只係幾分鐘。餐廳要上樓上，二/三樓都有房，全間都唔係好多檯，會去都係對食有要求嘅人。
素食套餐要提早一日預訂，兩位起先有得食。我覺得呢個套餐適合真係識欣賞Fine Dining嘅人，因為當中用到不同產地的靚食材、高超廚藝、食材味道口感配搭以至呈現手法，並唔係將啲菜煮得好食咁簡單，係需要當藝術品欣賞。如果對食無咩認識同品味，唔好勉強牛食牡丹，然後話好貴都唔知食咩。
義大利小番茄三重奏
呢個留意返個番茄凍有落魚膠粉，已經同廚反映左，如果你去食可以再問一問清楚。番茄除了意大利也有荷蘭產，有車厘茄也有Palm，單粒果粒係半焗車厘茄，即係焗左一半未焗晒，塊皮乾脆造型有趣。
番茄凍湯大概係液態番茄，超級濃郁。玻璃容器裝那個是番茄慕絲上面鋪一層番茄凍，味道係有層次，酸甜中亦有鮮味。
椰皇冬蟲草栗子燉湯、迷你酥皮筒配栗子蓉、椰子泡沫
超好飲個燉湯，我希望以後所有餐廳都用原個椰皇去燉湯，椰子的鮮甜每啖都飲到，更帶了栗子的美味。個酥皮筒非常酥脆，類似薄左的春卷皮，入面爆滿栗子好味道。
百合慕絲配鮮刨夏季松露及牛油百合汁
百合用兩種方式呈現，如果鮮百合其實我麻麻地鍾意食，果個脆的花瓣口感我覺得好奇怪。百合慕絲原來係打發左的蛋白，入口即溶，加埋黑松露又別有一番風味。
杏仁露筍配奶油瓜蓉、杏仁汁、菠菜油、鮮刨夏季松露
佢哋連條蘆筍都唔可以裸體上，特別要用杏仁和寒天包一層。然後各種只有一點點的蔬菜醬汁就非常Fine Dining標準擺盤，你可以食到每一種菜的鮮味，撈埋一齊又更好食。
流心羊肚菌汁水煮嫩蛋、甘筍蓉、夏季松露甘筍釀義大利羊肚菌
差唔多每道菜都有黑松露，大概素食名貴食材的代表首推黑松露。中間是半熟雞蛋，它還注滿羊肚菌汁，香港真係好少餐廳咁費功夫，流心蛋通常只流蛋黃，這個會流蛋黃加羊肚菌汁。旁邊那粒羊肚菌也釀了松露甘筍汁，一啖食到兩種高級菇菌的香味，真係有種味道在口中炸開的感覺。
日本蒟蒻配姬松茸忌廉汁及鮮刨姬松茸片
你想像一下姬松茸忌廉意粉個汁，然後拎走啲意粉，換成日本蒟蒻，口感是不是更有趣了，而且可以更好享受那個姬松茸忌廉汁。
夏季松露冬瓜千層、鮮刨夏季松露、馬蹄汁
以下兩個係加購項目，因為個餐無澱粉質，所以絕對食得晒，有預算的話強烈建議要食埋，兩個都好特別。
夏季吃瓜，於是冬瓜配黑松露就很合理了，我真係從來無諗過咁食，通常中餐都係釀啲野入冬瓜再蒸就已經好勁。這裡是將冬瓜切薄片，中間再夾黑松露，因為蒸完口感比較軟，所以下面配返個有咬口的馬蹄汁。
水牛芝士糯米釀意大利青瓜花配泰式咖喱汁
這個我超期待，之前看MasterChef經常有參賽者煮，香港真係連個菜名都未見過，我諗好多中廚更加唔會識，個花入面釀左水牛芝士和糯米，花和糯米本身都係淡口味，點個咖哩汁食就剛剛好。花莖其實就係未長大的意大利櫛瓜，嫩口好味道。總算體驗到釀意大利青瓜花，開心。
鮮芒果慕絲配椰汁、芒果汁、金柚、鮮芒果、西米、脆蛋白及冰凍金柚粒
甜品咁大碟XD 上桌的時候會用液態氮凝固金柚粒，好好玩，白色那些大概就係冰雪的口感，所以咁大碟都唔驚太飽食唔曬。中間就收埋左芒果肉、芒果慕絲和西米，身為芒果愛好者好鍾意。上面好似蝦片果幾塊係脆蛋白，入口即化的甜餅。
呢餐完全係我run個素食page以來覺得最勁的一餐，介紹俾品味素食人士。
+++++
Follow me on Instagram @misskitb
+++++
餐廳資料
壹玖捌叁 Hong Kong Cuisine
地址：跑馬地載德街2-4號雅怡閣1樓
電話：28933788
營業時間：11:00–15:00、18:00–22:30
官網：https://1983hkc.com/
FB：https://www.facebook.com/1983hkcuisine
IG：https://www.instagram.com/hongkongcuisine1983/
地圖：
+++++
Δ 版權所有 (歡迎轉貼連結。嚴禁全篇圖文轉載！)
Δ 廣告查詢：hello@veggirlclub.com
Δ 邀訪 / 合作 請洽：misskitb@gmail.com