最近好多人開始加入吃素的行列，平時食開豬牛雞海鮮，唔食肉一下子可能唔知食乜好。其實蔬菜水果豆類五榖堅果種籽加加埋埋都好多野食，唔好太焗限自己的想像力，將蔬菜煮得好食唔係咁難架咋。
抗疫廚神日記系列：加入Patreon付費會員支持素食推廣
(1) 一個人自己煮三餐 一周七天無肉菜單
(2) 唔食肉你可以！一周家常簡單素食譜
(3) 素食減醣怎麼吃？
+++++
【 Misskitb 粉絲專屬好康】
iherb 優惠碼：MIS8129
+++++
DAY 1
早餐：生酮藍莓微波爐蛋糕 / 西西里咖啡
屋企有藍莓和cream cheese又想吃蛋糕仔的話，焗這個就最方便，今次我減了椰子粉的份量又勁加藍莓，吃起來更鬆軟，nice。西西里咖啡即是檸檬滿+黑咖啡，前陣子在台灣紅過，因為雪櫃有枝檸檬汁就整下。
→ 點我看生酮藍莓微波爐蛋糕食譜
午餐：菜菜子溫沙拉
其實我很常吃這種一盤過的蔬菜沙律，因為只需要洗一隻碟又唔需要諗擺盤最方便。菜菜子溫沙律的重點是很多很多種不同顏色的蔬菜，有牛油果和烤焗料理，最後灑上常備的大麻籽、南瓜籽和杞子，這樣就輕鬆增加三種食材了。
晚餐：三杯杏鮑菇 / 米糠漬大根 / 燙菠菜苗 / 巴西莓汁豆乳 (Vegan)
樓下街市有九層塔賣，所以要煮三杯杏鮑菇。先爆香薑片/薑條，杏鮑菇略炒再加醬油、黑麻油和米酒，痴線亂煮都好好食喔！另外燙個菠菜苗又一餐台灣風味。
++++++++++++++++++++++++++++++++++++++++++++++++++++++++++++++
DAY 2
早餐：素豬柳蛋牛油果漢堡 / 紅龍果汁豆乳
最近 Green Common 的漢堡有半價優惠，買左個Beyond豬柳堡外賣食唔晒，第二朝我自己加煎蛋和牛油果 upgrade 一下，好久沒吃過麥記豬柳蛋漢堡，覺得療癒。這個Beyond豬柳都幾好食喎。
午餐：新豬肉蓮藕餅 (Vegan)
特登買左蓮藕想煎蓮藕餅，用新豬肉整其實好簡單，煎一煎就食得。因為我不吃澱粉的關係直接食，你可以配飯或者配麵啊。
→ 點我看影片製作教學
晚餐：Paneer Masala / 芝士焗油揚
我好鍾意行印度超級市場，入面好多新奇的素食材料，價格也好便宜！其中一樣我經常買的就是印度茅屋芝士 Paneer，通常放在凍櫃，有整大片的也有預先切好的，我會買成板一公斤回家慢慢食。
Paneer 煎炒煮炸都OK，我通常煮咖喱，這次用了也是在印度超市買的「Paneer Masala」香料粉，先用罐頭番茄碎加水加香料粉煮個底，再加埋南瓜粒和Paneer煮一煮，好快就食得。又因為唔食澱粉質的關係，我焗了芝士油揚配咖喱，雖然無naan餅咁勁蒜香咁傳統，但都好夾好好食架！
++++++++++++++++++++++++++++++++++++++++++++++++++++++++++++++
DAY 3
早餐：煎素雞番茄 (vegan)
買左舊素雞唔記得食，早餐煎一煎都唔錯啊。這條有沙薑味，買的時候無為意，後來才想到因為係素「雞」所以配沙薑。
午餐：泰式打拋天貝 (vegan)
我喜歡用很多辛香料炒東炒西，這個炒天貝加了南瓜營養均衡，夠濃味夠惹味，配飯或者夾生菜包都好正啊！
晚餐：韓式辣豆腐湯煮油麥菜 (Vegan)
懶人料理一鍋煮，唔想煩的時候好容易有餐好既食。我用了昆布湯底加韓式辣醬，打韓式硬豆腐、油揚、鴻喜菇和油麥菜全丟進去煮，好快就有得食。
→ 點我看韓式辣豆腐湯食譜
++++++++++++++++++++++++++++++++++++++++++++++++++++++++++++++
DAY 4
早餐：芒果椰子Overnight Oats (Vegan)
天氣開始變得炎熱，要出動清涼的早餐了。Overnight Oats 製作方法超簡單，而且只需要燕麥和植物奶兩種主要材料，擺雪櫃浸一晚第二朝拎出來就食得，非常方便！我這樽用還加了台灣愛文芒果浸，輕早再加些切碎堅果、99%朱古力和椰子，整個熱帶風情清新怡人！
話說我的台灣愛文芒果是去年收到，但因為果排剛開始戒糖，所以我將佢地切左再放冰箱冷凍，雪左一年都仲食得，幾好。
午餐：Subway素扒潛艇堡
最近在做一個「HK$50樓下」素漢堡的專題，經過 Subway 醒起佢地的潛艇堡都幾平，最最最平的蔬菜堡只係 HK$29，呢款係素扒堡要 HK$39，都平過好多其他地方，而且幾好食。
晚餐：泰式打拋天貝生菜包 (Vegan)
前一日煮了打拋天貝，所以特登買幾棵水耕菜食生菜包。水耕菜的好處是比較乾淨，唔會有泥有農藥，求其沖下就食得，適合唔得閒或懶洗菜的人。缺點就係菜葉無咁脆口，菜味好似都無咁香。
++++++++++++++++++++++++++++++++++++++++++++++++++++++++++++++
DAY 5
早餐：朱古力雜莓奇亞籽布甸 (Vegan)
因為我4月底開始在《橙新聞》會有一個全新影音專欄，所以最近都在思考有甚麼題目可以拍，又因為我有儲稿強逼症的關係，專欄出街之前我已經拍左3.5集 XD 這是第三集的內容，跟前一日的早餐有點關係，到底是甚麼呢？
午餐：Paneer Masala + 薑黃椰菜花 + 脆脆芝士油揚
這是我的低醣印度咖喱餐，芝士咖喱夠辣，配脆油揚或配飯都好好食。預先煮好大份量椰菜花飯和咖喱，唔得閒煮的時候都可以好快有野食。
晚餐：三杯秋茄子 + 煎椰菜仔煎豆腐
在街市見到青綠色表皮的茄子，檔主說那叫「秋茄」，比紫色的茄子好食，仲可以降血壓，身為茄子愛好者，當然立即買一條試下。事實上，我同時買左白色、青色和紫色茄子XD，我喜歡不同顏色的蔬菜mix and match。
在同一個街市還買到新鮮九層塔，所以我要煮三杯茄子。三杯XX的做法異常簡單，先爆香薑片再炒蔬菜或菇類，調味是一杯醬油一杯麻油一杯米酒，基本上比例1：1：1就可以了。我覺得三杯XX的靈魂其實是九層塔，起鑊前記得放一把再炒幾下。另外，我使用台灣帶回來的黑麻油更滋補。
煎椰菜仔和豆腐上面，淋了大量我自己做的超級蔥蒜醬。這個是我之前去首爾上純素烹飪班學的，將蔥、洋蔥和蒜頭等切碎碎，再加入醬油、麻油、味醂和蘋果醋等混合，有少少似打邊爐的時候亂溝果個醬汁，整定一大樽放雪櫃可以慢慢食幾日。這個蔥蒜汁可以配任何蔬菜食，求其煎一煎焗一焗，再加個汁就超好食啦！
++++++++++++++++++++++++++++++++++++++++++++++++++++++++++++++
DAY 6
早餐：香蔥番茄煎蛋
番茄、蔥和雞蛋，平日經常吃的食材，換個煮法就很有新意，母親節煮這個給媽媽吃也不錯啊。
午餐：滿門抄斬親子丼 XD
這個丼用了椰菜花飯做底，上面有椰菜仔、洋蔥、Heura素雞柳和雞蛋，汁的部分很簡單用醬油、味醂和昆布粉，亂煮都好好吃。
晚餐：蔥油煎雙色茄子 + 蒜蓉油麥菜 (Vegan)
茄子簡單煎一煎，淋上預先整好的蔥蒜醬，開開心心又一餐。另然再炒個蒜蓉時蔬，全部都係菜但唔會唔夠飽。
++++++++++++++++++++++++++++++++++++++++++++++++++++++++++++++
DAY 7
早餐：蔬食早晨全餐
簡單的早晨全餐，有比卡超出場就完全唔同晒。
話說我本來想煎經典的腸仔心形煎蛋，但個素腸仔一切就散開，無辦法。
咖啡的部分，我嘗試用 French press 壺+豆奶打泡，結果個奶泡太勁，完全拉唔到花。
午餐：無肉食外賣 自選餐盒(HK$50)
無肉食旺角店現在除了堂食，還有三種外賣選擇，可以揀2/3菜飯、自選飯盒或單點套餐。我咩都想食又想好多種菜，當然揀自選飯盒自己夾，食完好滿足，仲有靚湯飲添。
晚餐：走肉蔬食研究所外賣 台式鹵水拌盤配素肉燥飯 (HK$65)
正所謂無得去台灣都要食肉燥飯飲珍珠奶茶！
前日去走肉蔬食硏究所拎素粽，順便試下新推出的台式鹵水拌盤配素肉燥飯 (HK$65)，拌盤有豆腐、白蘿蔔、素雞和鹵水蛋都幾豐盛，肉燥飯個汁都好好食，又真係幾有台灣風味。
飲品則在深水埗黃金商場附近新開的壺說-台灣好茶買，小店由來自台中的夫妻經營，我好鍾意個西柚檸檬果茶 (HK$28)，酸酸甜甜咁好清新。
順便介紹下我前排上網訂的環保大象杯Elephant Cuppa，原來已經有香港代理(？)，總之上香港網站訂就唔使運費啦，喜歡喝台式飲品的你必備。
抗疫廚神日記系列：加入Patreon付費會員支持素食推廣
(1) 一個人自己煮三餐 一周七天無肉菜單
(2) 唔食肉你可以！一周家常簡單素食譜
(3) 素食減醣怎麼吃？
+++++
Δ 版權所有 (歡迎轉貼連結。嚴禁全篇圖文轉載！)
Δ 邀訪 / 合作 / 推廣 / 聯絡請洽：misskitb@gmail.com