吃素的你會不會好掛住港式飲茶呢？原來北角有一間素食餐廳 素之樂創意蔬食料理 午市有素點心食，而且品項同你去一般茶樓差唔多，仲即叫即蒸好好食添！
+++++
【 Misskitb 粉絲專屬好康】
iherb 優惠碼：MIS8129
Joirme香薰蠟燭8折優惠：kitty2021
找得意食譜/料理靈感：https://linkin.bio/ig-misskitb
+++++
素之樂在北角和砲台山兩個地鐵站之間，北角站A1出口上地面轉左，然後一直行幾分鐘就會見到，幼稚園上面就係啦！
我這天去吃午餐，剛好預上幼稚園唔知返學定放學時間，一隊細路家長在門口排晒隊，穿過人群先入到去餐廳。
餐廳內部環境比我想像中Grand，裝修有格調，約長輩朋友飲茶唔會失禮。
坐低飲茶每位收茶芥HK$12，壺茶係玄米茶，應該無得揀普洱壽眉之類。
有方檯有圓檯，目前疫情有限聚令最多坐四個人。
素之樂午市做點心小菜，中場有休息時間，晚市再做私房菜。午餐時段都有二人、四人餐可以揀，或者自己剔點心紙揀野食。點心類選擇都幾多架，有包有糕有糯米雞有腸粉有蝦餃燒賣，我樣樣都想食。
後面仲有各種粉麵飯、湯和小菜，仲有甜品食架。我見到台灣素魯飯都有少少想揀。如果多幾個人來就可以點小菜食。
餐廳只招待會員，第一次來吃可以即場申請入會。我以為係留手提電話就可以入會果種，原來都要填申請表。入會完全免費，仲即刻就有過埋膠的會員証，除了用餐有九折之外，在隔離超市購物都有折扣。
叉燒腸粉 HK$38 (奶素)
菜單上大部分食物都屬純素，有小部分係奶素，全部都有標明。腸粉類有六款，因為我好耐無食叉燒腸，所以貪得意試下。腸粉皮略厚，入面個素叉燒甜甜地，我覺得個皮薄返少少會更好食。
因為好耐無飲茶，我覺得應該叫蝦餃燒賣過口癮。
松露燒賣 HK$39 (4件/奶素)
燒賣入面都係大豆素肉之類，我覺得口感幾好，味道都幾似真燒賣。上面堆黑松露醬唔算特別香，少少味咁，整體來說過口癮係幾爽。
珍珠蝦餃 HK$28 (3件/純素)
雖然叫珍珠蝦餃，但實際上都算大隻，入面有素蝦素肉之類，都做到皮薄餡靚幾好食。
芋香雞扎 HK$28 (2件/純素)
這個雞扎勁大隻，我覺得幾抵食。腐皮捲住素雞、芋頭、玉米荀和冬菇，全部扎扎實實好大件，食晒兩隻都幾飽。芋頭蒸得粉粉，冬菇夠香，夾埋少少腐皮好好食，我都幾鍾意。
食完可以去隔離的素食超市逛逛，順便買素料和素食產品返屋企。
除了一般台灣進口素肉產品之外，我最推薦係台灣天貝，八豆天貝真係好好食架，即接煎來吃已經好香，未食過可以試下，香港好似只有這裡買到。
另外找到這款外面無的「味來肉」產品，「Phuture」是馬來西亞品牌，係一種素肉碎產品，香港暫時未見有其他餐廳用，想試下唔同品牌可以買包返屋企煮下。
另外我覺得幾得意係上面這個自己發熱火鍋，我第一次見有素食版本，可以帶去露營之類，不過盒野勁重。另外有生酮人士適用的豆腐紙和羅漢果糖，另外都有好多素食醬料，仲有素狗糧添！
除了冷凍素肉，都可以試下脫水產品，植物奶有137和Oatly，亦都有即食素料包，仲有台灣風味冬瓜茶添。
港島區的素食朋友如果仲未去過素之樂的話，記得上去望下同埋入貨，或者約朋友飲茶都係一個好去處。
+++++
餐廳資料
素之樂創意蔬食料理 / Vegelink vegetarian restaurant
地址：北角渣華道56號胡曰皆商業中心一樓108室
電話：+852-2807-1130
營業時間：12:00–14:30、18:30–22:00
官網：http://vegelink.com/zh/
FB：https://www.facebook.com/vegelink
IG：https://www.instagram.com/vege_link/
地圖：
+++++
Δ 版權所有 (歡迎轉貼連結。嚴禁全篇圖文轉載！)
Δ 邀訪 / 合作 / 推廣 / 聯絡請洽：misskitb@gmail.com