[香港素食] 銅鑼灣 | 肥後屋：素食友善日式串燒 平日蔬食午餐

如果想食日式串燒，很多人都推銅鑼灣這間居酒屋，佢地最近就推出左午市套餐，每個禮拜變三個蔬食料理俾你揀，價錢唔貴亦整得用心好味道，堂食或外賣都可以㗎，食完覺得好食再約朋友夜晚食串燒都得。(每周菜單請留意餐廳 IG 公佈)

[香港素食] 太子 | Happy Belly Hong Kong：特製馬德里魷魚刈包

如果你去開太子始創中心，呢個商場有素食餐廳又有素食材賣，地庫這間小食店仲有個素食刈包可以醫肚。選擇就只有一個，軟棉棉刈包入面有三個炸素魷魚圈，配個微辣蕃茄醬，都幾惹味啦。佢就無套餐揀嘅，可以再散叫薯條，飲品就有咖啡、果茶和冷泡茶。

[香港素食] 銅鑼灣 | 合和荳品：自家製手工豆品 有機無糖豆漿

銅鑼灣這間豆品店細細間，估唔到所有豆品到素餃子素春卷全部自家製作，豆漿更加選用有機無基改黃豆，飲落確係唔同！餐牌上找到一系列素食選擇，滷水豆腐超級滑又入味，推薦！食素餃子的話要留意個湯係豬骨湯(可走湯)，自家製素春卷非常飽滿，入面仲有綿綿芋頭好味道。

[香港素食] 九龍城 | HOMEBROWN：用心製作蛋奶素Brunch

如果你對飲咖啡好講究，又想食個靚靚早午餐，介紹你九龍城呢間咖啡店。主打早午餐用料上乘煮得有心機，每日提供一至兩款蛋奶素選擇。手沖咖啡超級專業，意式咖啡使用單品豆，杯子和奶量都會仔細配搭，仲有個超特別未飲過的咖啡果皮蜂蜜茶。店內不時舉辦特色文化活動，想飲夜啡都可以留意下㗎。

[香港素食] 長沙灣 | 三寶素食：平價素壽司卷 中式飯麵套餐

長沙灣新開業齋鋪，一對夫妻加個小男孩打理，主打素食壽司卷，另外也有炒飯和每日不同的自選兩餸飯。菜式部分含蛋奶，店內有張紙仔列晒出嚟，有需要走蛋奶可以落單講聲。街坊式親切服務，食物即叫即製，簡單美味。

[香港素食] 旺角 | 蟲二 Poach：天台空間日式蔬食

旺角朗豪坊後面有楝保育建築，頂樓找到這間特色小店，主打日式家庭料理，餐牌上有數個無肉之選，平日午餐亦可以蛋奶素食。如果要約不同飲食習慣的朋友傾偈聚會都好方便，環境也舒服好坐，記得先Save低啦。

[首爾素食] 合井站 | forfourBread：溫馨純素麵包餅店

已經開業5年的純素麵包店，店主曾經有嚴重過敏，轉吃純素之後才得以根治，所以開始焗純素麵包，與另一位做純素蛋糕的朋友開了這間小店。店內有數個座位可以堂食，配豆奶咖啡。想買方包建議早一點去，因為很多當地人買有機會沽清。

[香港素食] 大角咀 | 素來素往：HK$68不限時自助下午茶餐

奧運站附近的素食自助餐，午市、下午茶和晚市價格分別為HK$75 / HK$68 / HK$128，期中下午茶更係不限時間，長者卡仲有折扣添，一家大細去食都可以。這間自助餐食物選擇一定唔係最多，但當中都有唔少特色野食，蛋奶素為主，一路食一路都見到店員補充食物，唔會話不限時其實無野食。

[香港素食] 大角咀 | 十二味：自選多款蔬菜麻辣香鍋

全香港有二十多間分店的麻辣餐廳，主打香鍋有辣有唔辣，可自己揀多款蔬食配料。全線用手機點餐方便客製化，一大鍋重口味蔬菜吃得非常滿足。部分小菜亦可以轉做全素，喜歡吃辣的素食者必須收藏。

[香港素食] 長沙灣 | 佛友源素食：平價街坊齋鋪$40三餸飯

藏身在舊式商場的街坊齋鋪，現場設有簡單座位，半自助形式自己裝湯裝飯，食完都要自己收碗碟。食物係傳統中式齋Style，三餸飯約有8個餸揀，主要都係不同口味的腐皮卷。紫菜卷和素雞脾都係自家製作，亦有雲吞蘿蔔糕等，很受長者歡迎。

[香港素食] 灣仔 | Bengal Brothers：素食友善印度菜 逢周二素食盛宴

鍾意食印度菜必須記低灣仔這間新派印度餐廳，粉色系裝修充滿活力，重點當然係餐牌上有多款素食/純素選擇！餐廳最近更以蔬果為主角，逢星期二推出素食大餐，包括一個蔬菜咖喱、飯、抓餅和醃漬蔬菜等滿滿一盤。5月新登場的主角是青芒果，想試下印度芒果咖哩就約朋友星期二lunch time去啦！

*套餐是蛋奶素，非純素。