邊個話食素同港女打卡唔可以共存？非常受愛美女生們歡迎的英倫時裝名牌Vivienne Westwood Cafe，最近就推出左一系列素食菜式，連最受歡迎的招牌下午茶都有素食版，唔食肉一樣可以勁影靚相，快約朋友去試試！
++++++++++++++++++++++++++++++++++++++++++++++++++++++++++++++
按讚我的粉專，追蹤最新鮮早餐與蔬食旅遊情報：
++++++++++++++++++++++++++++++++++++++++++++++++++++++++++++++
Vivienne Westwood Cafe 在銅鑼灣 Fashion Walk，由地鐵站E出口行過去唔洗一分鐘，餐廳在時裝店的樓上，可以在商場搭扶手電梯上去或者入店內行樓梯上。
地點咁就腳，經過銅鑼灣想搵地方坐低飲咖啡傾計都唔錯架。
備受打卡女孩們愛戴神奇下午茶套餐，每日下午兩點後供應，圖中這款是葷食，不過最近餐廳推出左素食版，詳情可以看下面的Menu。
我第一次來Vivienne Westwood Cafe，店入面都幾好氣氛喎。
近門口有一個蛋糕櫃，件裝甜品和大個裝蛋糕都有，如果需要訂生日蛋糕之類都可以望下。
真係來自英國的下午茶餐具就係特別精緻，未食都開心定先。
非常愛麗斯夢遊仙境感覺的大鐘！這個鐘還真的會動啊！
餐廳入面座位唔算非常多，位與位之間都隔得幾開，坐得非常舒服。每個角落都有唔同特色，坐唔同位可以影到唔同感覺的打卡相。
厚實的木桌木椅都好有歐洲感覺，真係好想可以快點再去英國旅行。
入面這個歐洲油畫背景可以影公主Style宮殿相。
全新推出的素食餐牌就在頭兩版，除了素英式下午茶之外，仲有素肉醬意粉和低卡素食英式早餐，全部都非常吸引喎！
素英式下午茶餐有包兩杯無酒精飲品，可以揀咖啡、茶或梳打特飲之類。
紫色的蝶豆梳打都幾適合影相架。
玫瑰拿鐵
這裡的咖啡奶泡上面都有品牌LOGO，真係讓人好虛榮，當然仲好靚添啦！朋友就叫左壺熱薑茶，集齊成套英式靚瓷器茶具影相。
素英式下午茶 HK$688(兩位用)
特色鹹點
迷你未來牛肉漢堡
青瓜粒素菜脆餅
夢幻紫薯撻
柚子藜麥沙律
蘆荀酥皮撻
菇菇酥皮撻
手工甜品
時令水果撻(4件)
提子鬆餅配奶油忌廉及果醬
小食
手工番薯脆片
*素下午茶需於24小時前預訂
食之前要影二萬張相先，這個格仔鐵罐牆影打卡相又真係幾有氣勢喎！
層架第一層係兩杯柚子藜麥沙律，味道非常清新喎！我比較少食甜味的藜麥，入面有一條條柚子蜜，估唔到人人以為好悶唔好食的藜麥，可以用這個有特的方式呈現。
另外四件是時令水果撻，件件都唔同味，我就食左藍莓同埋梨，口味偏甜但非常好食喎！個撻皮又薄又香又脆，入面的慕絲幼滑香濃，可以獲得十分滿分。
第二層係一系列鹹點，迷你未來牛肉漢堡細細粒，但我都好有儀態地分左三啖食，我覺得味道幾有驚喜，夾埋麵包芝士係誠意之作。青瓜粒素菜餡餅上面有少少沙律醬，食起來都幾開胃。
超級靚的夢幻紫薯撻，當然要幫佢影一張獨照！撻皮同樣夠薄夠香夠脆，難得我會食到覺得輕巧的紫薯泥，非常加分！上面的脆脆條、酸酸果和食用花都夠畫龍點睛。
最底層仲有兩件酥皮撻，我食左蘑菇，入面都幾夠汁，酥皮又好好食喎。雖然食物都細細件，但食起來都幾飽，差點吃不完提子鬆餅！鬆餅外表看起來有點像曲奇，咬下沒想像中硬實，反而仲幾香幾鬆，我勁搽奶油忌廉食，咁先有食英式下午茶的感覺。
蠻大碟的手工番薯脆片好適合聊天的時候有野咬下，番薯切得夠薄，吃起來不會覺得油膩，味道微微帶薯香又不會太鹹。
市面上都好耐無素食下午茶啦，今次竟然係英倫名牌Vivienne Westwood Cafe出品！食物夠精緻有質素之餘，仲可以影二萬張相打卡，真係好適合帶女朋友或者約朋友一齊去享受架！事不宜遲，記得要24小時前預訂啊！
+++++
餐廳資料
Vivienne Westwood Cafe
地址：銅鑼灣百德新街27-47號9-10號號地舖
電話：2799 5011
營業時間：11:00–20:00
官網：https://www.viviennewestwood.com/zh/
FB：https://www.facebook.com/viviennewestwoodcafehk
IG：https://www.instagram.com/viviennewestwoodcafehk/
地圖：
+++++
Δ 版權所有 (歡迎轉貼連結。嚴禁全篇圖文轉載！)
Δ 邀訪 / 合作 / 推廣 / 聯絡請洽：misskitb@gmail.com