雖然我從來未去過斯里蘭卡，但就食過好多斯里蘭卡才有的新鮮蔬果、果汁、素食醬料以至素肉產品，點解既呢？點解既呢？因為我成日去 V brands 行街囉！如果你都鍾意食異國風味，想搵有機素食產品，最好仲食得辣，來這邊會有好多開心大發現，必定可以買個不亦樂乎。
【 Misskitb 粉絲專屬好康】
iherb 優惠碼：MIS8129
Joirme香薰蠟燭8折優惠：kitty2021
找得意食譜/料理靈感：https://linkin.bio/ig-misskitb
+++++
V Brands 最近搬了新鋪，由原址搬上一層，鋪位面積大左一倍，貨品種類都多左好多。
好似來到斯里蘭卡百貨公司，由服裝飾物、新鮮蔬菜、護膚品、生活用品到各式各樣的食品都有。天花仲好似超市咁掛左標示木牌，這些木牌也很特別，原來都是用舊門舊櫃之類 upcycle 製成，而且全手繒好精美。
好可愛的手繪公仔，這一對是斯里蘭卡的新人，穿上傳統結婚禮服的樣子。
貨架有好多排可以慢慢行，上面有好多聽又無聽過、見又無見過的東西，我每次來睇都要google同查字典，乜原來斯里蘭卡食既野同香港咁唔同。
這些一包包的是即食乾燥素肉，入面有素肉粒和味粉，打開之後先將素肉泡水還原，再用入面附的醬料包煮一煮就食得。包包都唔同口味，可以試下各種斯里蘭卡咖喱，好平一包煮出來勁大碟。我之前有試過一次，個素肉食成上內有點像麵筋，好吸水的質地，食半包已經好飽，而且有少少頂住個胃。不過幾方便幾得意既，可以買幾款口味試下。
想搵香料、咖啡粉、咖啡和茶葉，這裡也是好地方，尤其是靚斯里蘭卡紅茶啦。
窗邊的貨架找到這些傳統煮食用的陶碗，聽說用這個煮食會有特別香氣。我問過一下，這些陶鍋可以用直火煮，焗爐就唔入得。因為我屋企係電磁爐就無辦法用啦。
這個牌子的咖喱醬我好喜歡，之前試過幾款，最鐘意這個 HOT CURRY。這些咖喱醬好容易用，尤其如果你唔識用咖喱粉，我會先炒洋蔥蒜頭果d，再加咖喱醬炒香，之後就可以落水或者椰奶，再煮埋其他料就食得。這系列的咖喱醬都沒加甚麼糖，成分都係香料為主，所以都健康既。
這個神奇水果叫「棘果番荔枝」，我都係 google 先知它是甚麼來頭，據說有抗癌作品。這款果汁我以為飲起來會好酸，但一飲先發現果香十足又幾好飲。它有無糖和低糖兩款，無糖那枝其實落左代糖，所以飲起來都有少少甜味，完全唔會酸。除了抗癌之外，這個果汁還有清腸胃效果，飲完係即刻，即刻覺得想去廁所。
這個是斯里蘭卡傳統飲品，我諗係類似珍多冰果類，一盒入面有果凍粉和其他飲品配料，可以自己在家變出來，夏天消暑都幾正架。
斯里蘭卡都係椰子產地，所以都有好多椰子產品，包括椰子殼餐具。V Brands 入這些設計都幾靚，非常買得落手，連湯匙都特別可愛。中間好大個果個原來係鹽樽，據說斯里蘭卡人習慣用海鹽煮食，會先將海鹽溶落水變鹽水再調味，平常就會將海鹽儲存在這種瓶子裡。
這系列阿育吠陀的香草茶都好特別，我之前完全無接觸過這門傳統醫學，他們用的藥草真係聞所未聞，又長新知識。我有逐盒望過一下有甚麼功效，基本上大部分都可以減磅和幫助消化。
我最近就飲緊這個 20 Day Cleanse Tea，仲好神心咁每日飲，差唔多飲晒成包啦！它入面其實都係茶包，沖熱水就飲得，我起初以為係香草茶啦，點知係茶既！係斯里蘭卡苦茶！不過飲飲下就習慣，而且我需要有苦味平衡一下五味。
最神奇的地方係這個茶真係有效用，飲左之後小便量多左好多，夜晚飲多左水都唔會半夜尿急要去廁所，每晚一覺睡到朝早七點。我覺得非常神奇，對阿育吠陀的第一印象極佳！
各種即食醬都好正，我之前試過一個茄子醬，好香勁好食但同時都非常辣，平常吃小辣的人應該應付不了。不過一開就食到異國風味係幾方便，用來配飯配麵以至塗麵包食都得架。
新來香港的手工果汁，全部都係一些好少飲到的配搭，例如 Green Orange 和辣芒果汁等，夠晒創意。個辣芒果汁原來源自斯里蘭卡的地道街頭小食，類似醃芒果咁，但佢製作成果汁可以飲，我都幾期待試飲。
這幾天新鋪正式開幕，店內有提供一些傳統派對小食可以吃。像車輪那個是鹹食，脆米餅之類。前面黃色的是綠豆餅，入面都係好實在的綠豆，口感唔係軟綿綿果種，亦無想像中咁甜。中間那個也是用米粉做，添加了棕櫚糖，炸的時候要攪到佢拱起，又幾特別。吃起來也是淡淡甜味，有少少像蛋糕口感，第一次食覺得好有趣。
店內竟然仲有一整個雪櫃的純素產品，有幾款即食的餡料，亦有純素扒和腸仔等等，都可以試下架。
你有無試過行街市但個貨架上面的蔬菜水果全部都唔識？
我每次來 V Brands 都好似上左自然生物課咁，圖中最上這個像小刺的原來是苦瓜的一種，非常迷你版而且有刺，超級可愛！據說還可以連皮食，也可以拿來做苦瓜炒蛋。
左邊中間灰成一個個的叫「WoodApple」，它跟椰子一樣是硬殼，打開入面的肉來吃。如果好奇又驚唔識處理，店內也有 Woodapple 果汁可以買。最底下的黃色椰子係 King Coconut，它的椰子水是粉紅色的，也有一樽樽可以買，據說營養成分比一般椰子更好。
右上那個一粒粒的原來是 Jackfruit 的核，原來可以煮來吃！右排中間綠色那個是芒果的一種，切開入面都係好大粒核，粉核仲有刺，果肉係好酸既。
斯里蘭卡手工藝品也很有特色。
Jackfruit 是一種很常用的肉類代替品，young jackfruit 可以用來扮 pull-pork，外國人好鍾意整 BBQ Jackfruit 夾包或者做pizza，口感係幾好架！不過始終係水果，蛋白質含量唔高，設計餐單的時候要留意返。除了Jackfruit之外，我覺得最特別係有 Breadfruit，我第一次見！老闆說這個很罕有，每年只有幾個月產期，貨量好少賣完就無，有興趣自己留意返。
這邊的醬料全都係天然成分，吃起來比較健康一點。例如我最近在吃那個花生醬，它沒有加糖係食花生原味，入面加左兩種籽增加營養和咬口。我唔食麵包就會混落希臘優格食，都幾正架。
中間個貨架係斯里蘭卡優質茶葉，大概係遠古時代英國人去買茶已經存在的品牌，非常厲害。後面那排有各種特色零食，其中竟然連 Jackfruit 脆片都有，真係大開眼界。
傳統天然草藥系列，大概係阿育吠陀咳水和白花油之類。中間黃色那個類似板藍根或感冒茶，入面有十二種香料，加水即溶可以飲，亦可以加落茶、咖啡以至炒菜。我剛飲左一包，有少少辣又好香都幾好飲喎！它可以舒緩各種感冒病徵，呢排轉天氣覺得喉嚨乾燥唔舒服都可以飲，有預防效果。
雪櫃入面綠色的是 Gotu Kola，即是雷公根，即是崩大碗，也是一種健康的草藥/食材。老闆說可以當沙律菜食，不過它看起來有點可疑，我唔太敢就咁隊。
除了飲飲食食，V Brands 亦帶來一些斯里蘭卡手工飾品，我超喜歡這些大耳環啊！後面那個Lace+竹編袋也勁靚，面頭個Lace係人手編織架！手工非常精緻。
自從 V Brands 開業之後，我試左好多斯里蘭卡的唔同產品，想知我有甚麼新發現可以留意 FB 分享。希望疫情之後有機會去斯里蘭卡玩啦，一定好正！
+++++
資料
V Brands
地址：尖沙咀寶勒巷3號萬事昌廣場1602-1603室
電話：+852- 9089 1137
營業時間：11:00 - 19:00
網店：https://vbrands.hk/
FB：https://www.facebook.com/vbrandshk/
IG：https://www.instagram.com/vbrandshk/
地圖：
+++++
Δ 版權所有 (歡迎轉貼連結。嚴禁全篇圖文轉載！)
Δ 邀訪 / 合作 / 推廣 / 聯絡請洽：misskitb@gmail.com