去首爾玩機票係好平，不過平價住宿選擇不多，尤其一個人去又不想住Hostel的話，每晚預算起碼HK$400才比較方便舒服，質素較好的亦需要好早搶定，臨時出發或遇上長假期的話就更難了。
這間在新村地鐵站隔離，機場巴士站也很近，房間夠大也算乾淨。不過它之前應該做時鐘酒店為主，近年才轉攻做旅客生意。主要係入住時間有點古怪，其餘都算正常可接受，在Agoda預訂也沒被取消 XD。
【電子攻略/讀者優惠/其他平台：https://linktr.ee/misskitb】
+++++
機場巴士
仁川機場搭6002號機場巴士直達，車費17,000won，車程約一小時。雖然車費貴過搭機鐵，但我覺得一出海關直上巴士，唔需要上上落落、唔需要轉車亦唔需要搬行李，落車又通常在酒店樓下或平路數分鐘，各種各樣加起來好抵搭。
機場往Hotel Lassa的車站在酒店隔壁的商場，行過去幾分鐘，路唔難行。Hotel Lassa往機場的巴士站在酒店樓下，拉行李出路口過條馬路就到，而且好大個站有站牌、有顯示等幾多分鐘有車，非常安心。
WOWPASS
我係WOWPASS愛用者，出發首爾前完全無換錢，銀包得上次用剩兩萬零won。酒店樓下就係地鐵站，4號出入口落到去就找到WOWPASS機，直接入港幣換韓幣。需要入T-money就㩒錢出來過隔離部機入，韓國所有地方基本上都係簽卡，除左街邊檔都無咩機會用現金，唔好煩。
酒店位置
新村站4號出口直達，這個出口有升降機唔驚搬行李，出站則要行一小段斜路去酒店門口，路不長我覺得還好不太辛苦。
Check-in手續
我在Agodo上面訂房，去到出示訂單編號就俾鎖匙我，連Passport都無對，真係幾時鐘酒店。另外要留意返，Agoda上面有寫明，入住時間是晚上10時後，因為我去到都夜晚，諗住去到食晚飯再行陣超市都差唔多，結果九點半定九點九去到，成功Check-in唔需要等到10點。
出發前我有在Agoda發訊息問酒店可唔可以提前去放行李，不過無收到回覆。去到酒店見到大堂有一堆行李箱，我估應該可以提前放行李掛。
大堂環境和設施
大堂環境比我想像中好，網上看到的圖片感覺一般，現場所見又幾光猛闊落，有沙發位可以坐，最正係有雪櫃、咖啡機和微波爐。咖啡就通常出街買都唔會在酒店飲，不過我每日出門口都會在雪櫃拎枝水，夜晚就拎兩枝上房，全程無在便利店買水，作為一個勁飲水的人省不少錢。
房間環境
跟網路上看的圖片差不多，我主要因為佢有好大隻窗而揀，平價旅館通常無窗我就唔太想住。環境整體來說都算乾淨，我就無特別check啲角落位甚麼的，基本上用到的地方和床單都無爛無污跡。床褥偏硬身承托力好的那一種，枕頭正常，無特別舒服或唔舒服。
廁所環境及設備
廁所都幾大間，正常設計，淋浴間有輕輕隔開，沖完涼唔會成個廁所濕晒。佢竟然有rainforest show都算犀利，韓國的廁所設計一般比較弱。牆上容器有洗頭水、護髮素和沖涼液，因為唔識睇韓文，第一晚沖涼的時候靠估，好叻無估錯。我覺得洗頭水護髮素可以接受，沐浴露個提子味就搞唔掂，我用返自己帶的香皀。
房間設施
登記入住的時候，除了房間還獲得一包雜物，打開發現全部都用唔著。連即棄毛巾都唔吸水嘅，唔知用嚟做咩。
雪櫃上方的櫃筒內有熱水壺、水杯、即溶咖啡、風筒和殺蟲水，我第一次在酒店房找到殺蟲水，非常funny，不過我住四晚都無見到蟲需要殺。
電視可以睇 Netflix(唔需要自己acc登入)，當然係韓文版，順便睇多次黑白大廚無字幕版。如圖所見，擺行李和雜物的空間非常足夠。
順帶一提，入住四晚中間無人執房，我唔肯定係唔包定要求先會執，唔執有唔執的好處，啲野亂擺都無所謂，垃圾甚麼的我個人好整齊，唯一係條毛巾用四晚佢又無地方掛比較煩，我上次住果間有毛巾擺出來任拎，可以自己換，呢間我諗要特別問佢先有新毛巾，或者你可以考慮自己帶或買。
床頭有兩個韓國兩腳插頭電掣，要帶轉插頭，因為我帶左一開四USB叉電插頭，所以夠用有餘。
房間最大問題應該係熄唔到冷氣，唔插房卡取電冷氣都會長開，而佢個冷氣我校到27度都幾大風幾凍。後來我將個風口關到最細，開住氣窗，著埋長裡衫睡才夠暖。
酒店對面有佔地三層的Emart超市，入面有埋No Brand，要買手信買立雜野都方便。另外，因為我活動範圍以弘大為主，由酒店行過去只係10分鐘左右，身為一個好行得的人，行去弘大去埋合井站都濕濕碎，之後沿路或不同路線返酒店，日行四萬步唔使搭地鐵，慳車錢又點食都唔驚肥。
除左行去弘大，另一方向行去梨大都好多野睇好多野食，樓下新村亦係shopping熱門好去處。地鐵2號線去聖水洞都係一條線車都唔使轉，對我來說比住明洞更實際。
+++++
Follow me on Instagram @misskitb
+++++
詳細資料
Hotel Lassa 호텔 라싸
地址：서울 서대문구 연세로2가길 3 라싸호텔
電話：02-393-1199
地圖：
+++++
Δ 版權所有 (歡迎轉貼連結。嚴禁全篇圖文轉載！)
Δ 廣告查詢：hello@veggirlclub.com
Δ 邀訪 / 合作 請洽：misskitb@gmail.com